Қазақстан Сыртқы сауда палатасының төрағасы Германия елшілігінің Тұрақты орынбасарымен кездесті
2024 жылғы 11 желтоқсанда Астанада Қазақстанның Сыртқы сауда палатасының басқарма төрағасы Мұрат Қарымсақов пен Қазақстандағы Германия елшілігінің тұрақты орынбасары Ульрих Харальд Эрнст Кинне арасында кездесу өтті. Кездесу барысында экономикалық ынтымақтастықтың нәтижелері талқыланып, кәсіби білім беру, денсаулық сақтау, шағын және орта бизнесті қолдау, сондай-ақ «жасыл» экономика салаларындағы серіктестіктің болашағы анықталды.
Экономикалық ынтымақтастық: нәтижелер мен болашағы
Кездесудің басында Мұрат Қарымсақов Қазақстан мен Германия арасындағы екіжақты қарым-қатынастардың жоғары деңгейін атап өтті. Ол елдер арасындағы дипломатиялық қатынастар 1992 жылы орнатылғанын және сол кезден бері өзара тиімді серіктестік негізінде дамып келе жатқанын айтты.
.jpeg)
«Германия ұзақ жылдар бойы біздің стратегиялық серіктесіміз болып келеді және Қазақстан экономикасына ең ірі инвесторлардың ондығына кіреді. 2005 жылдан 2023 жылға дейін Германиядан Қазақстанға инвестициялардың жалпы көлемі 12,5 млрд АҚШ долларын құрады. Тек 2023 жылы елдеріміз арасындағы тауар айналымы 44%-ға өсіп, 4 млрд долларға жетті», –деді Мұрат Қарымсақов. Ол сондай-ақ Knauf, Siemens, CLAAS сияқты ірі компаниялардың Қазақстандағы ынтымақтастыққа қосқан үлесін ерекше атап өтті.
Қазақстанның Сыртқы сауда палатасы шетелдік инвесторларға серіктестерді іздеу, жобаларды сараптау және B2B мен B2G форматындағы кездесулерді ұйымдастыру сияқты толық қызметтер кешенін ұсынады.
Германияның бастамалары: кәсіби білім беру және денсаулық сақтау
Ульрих Харальд Эрнст Кинне Қазақстанның ынтымақтастықты дамыту жөніндегі белсенді жұмысына алғысын білдіріп, бірлескен күш-жігердің нақты нәтижелер әкелетініне сенім білдірді. Ол Қазақстанды Орталық Азиядағы маңызды серіктес және жаһандық бастамалардың, соның ішінде климаттық клубтың белсенді қатысушысы ретінде қарастыратынын айтты.
«Біз Қазақстанды аймақтық көшбасшы ғана емес, сонымен қатар экология, энергетика және тұрақты даму салаларындағы жаһандық бастамалардың маңызды қатысушысы ретінде қарастырамыз. Германия Қазақстанның осы бағыттардағы батыл мақсаттарын қолдауға дайын», – деді Кинне.
Ол сондай-ақ 19 қарашада Қазақстан Сыртқы істер министрінің орынбасары Роман Василенконың қатысуымен өткен сыртқы саяси консультациялар нәтижелеріне тоқталды.
«Бұл консультациялар барысында экономикалық өзара әрекеттесу мәселелері талқыланды. Қазақстандық тарап кәсіби білім беру және денсаулық сақтау салаларындағы ынтымақтастықты күшейтуге дайын екенін білдірді. Біз бұл ұмтылысты толық қолдаймыз және өз үлесімізді қосуға дайынбыз. Мәселен, келесі жылдың наурыз айында кәсіби білім беру мәселелері бойынша дөңгелек үстел өткізуді ұсынамын. Бұл тәжірибе алмасу мен жаңа шешімдерді іздеу үшін тамаша мүмкіндік болмақ»,– деді ол.
Кинне денсаулық сақтау мәселелері бойынша еуропалық елшіліктердің жұмыс тобын құруды жоспарлап отырғанын атап өтті. Ол бұл шараларға «Атамекен» Ұлттық кәсіпкерлер палатасының қатысуы олардың табысты іске асуы үшін шешуші фактор болатынын айтты.
«Біз Қазақстан тарапынан – басшылық пен бизнес өкілдерінің белсенді қатысуына сенеміз. Олардың кәсіби пікірі мен практикалық тәжірибесі біздің ортақ мақсаттарымызға жетуде маңызды рөл атқарады», – деді ол.
Кездесу қорытындылары
Кездесудің соңында тараптар белсенді диалогты жалғастыру және жаңа жобаларды жүзеге асыру үшін нақты қадамдар әзірлеу қажеттілігін атап өтті.
Мұрат Қарымсақов Германиямен білім беру және денсаулық сақтау сияқты стратегиялық маңызды бағыттардағы ынтымақтастықты дамытудың маңыздылығын атап өтті.
«Біз бірлескен бастамаларды жүзеге асыру үшін барлық қажетті жағдайларды, соның ішінде қаржылық және ұйымдастырушылық қолдауды ұсынуға дайынбыз. Ортақ күш-жігеріміз екі жақ үшін де нақты пайда әкеледі деп сенемін», – деді ол.
Бұл кездесу Қазақстан мен Германия арасындағы стратегиялық серіктестікті нығайту жолындағы тағы бір маңызды қадам болды, тараптардың ортақ мақсаттарды жүзеге асыруға деген қызығушылығын көрсетті.
Пікір қалдыру:
Пікірлер: