Жезқазған бизнес және көлік колледжінде Президент Жолдауы
Жезқазған бизнес және көлік колледжінде Ұлытау облысының Кәсіпкерлер палатасының ұйымдастыруымен Қазақстан Республикасының Президенті Қасым-Жомарт Тоқаевтың «Жасанды интеллект дәуіріндегі Цифрлық Қазақстан» атты Жолдауын талқылауға арналған кездесу өтті.
Кездесудің басты мақсаты – студенттерді еліміздің цифрлық трансформациясының негізгі бағыттарымен таныстыру, бұл үдерістегі жастардың рөлі мен олардың стартаптар мен бизнес-идеяларды жүзеге асыру мүмкіндіктері туралы жан-жақты ақпарат беру болды.
Шараның спикері ретінде көпжылдық тәжірибесі бар кәсіпкер, бизнес-коуч және Кәсіпкерлер палатасының менторы Орынкүл Сәдуақасова сөз сөйледі. Ол өз баяндамасында Президент Жолдауының негізгі бағыттарына тоқталып, цифрлық дағдылардың маңыздылығын, инновациялық ойлауды дамыту мен жеке бастамаларды іске асырудағы батылдықтың қажеттілігін ерекше атап өтті.
Кездесу барысында жастар кәсіпкерлігін қолдау мәселесіне ерекше назар аударылды. Спикер стартап жобаларды қалай бастау керектігі туралы практикалық кеңестерімен бөлісіп, жеке кәсіпті іске қосу кезеңдері мен жаңа бастаған кәсіпкерлерге арналған қолжетімді құралдар жайында айтып берді. Студенттер белсенді түрде сұрақтар қойып, Жолдаудың мазмұнына және өздерінің бизнес-идеяларына қатысты мәселелерді талқылады.
Ұлытау облысы Кәсіпкерлер палатасының адами капиталды дамыту бөлімінің басшысы Жаухар Тұрсынова Палатаның өңірдегі колледждермен белсенді ынтымақтастықты одан әрі жалғастыруға мүдделі екенін атап өтті. Ол жастарды елдің экономикалық дамуына ерте араластырудың маңыздылығына тоқталып, студенттердің кәсіпкерлік дағдыларын дамытуға бағытталған білім беру бастамаларын қолдауға дайын екенін білдірді.
Осындай кездесулер студенттердің елдің стратегиялық мақсаттарына саналы көзқарасын қалыптастырумен қатар, оларды өз жобаларын жүзеге асыруға шабыттандырып, Қазақстанның цифрлық және экономикалық болашағына үлес қосуға ынталандырады.
Пікір қалдыру:
Пікірлер: